牛魔王清湯腩咖喱專門店

營業中

休息中

最近要上堂，所以要食外賣，今次女朋友買左依間既清湯腩飯俾我。74蚊，我聽到既時候覺得外賣黎講有啲貴，但佢標榜用新鮮牛腩🐮，而且打開既時候份量有啲嚇親我，真係好多，唔係出面堂食得4-5舊牛，食落都差唔多有10舊。牛腩偏肥帶筋，入口有油香，係我鐘意既部位。不過睇相可以見到D肉有啲散，分開左啲肉絲，會攝牙，有少少扣分。個湯頭都清，有牛味，不過因為外賣所以唔夠熱。我加少少佢地既辣椒油🥵，辣椒油夠香同惹味。令到牛既味道提升左一個層次。整體都滿意，雖然價錢少貴，但新鮮牛腩嘛，下次會想試下堂食。