淘客小食 (已結業)

一排冇落黎澤豐呢頭搵朋友，發現都有唔少食店執左，例如英國佬 (我未食過咁就執左) 同時都有一啲新小食店開張，就例如淘客小食。店鋪環境有啲簡陋，但小店阿姐好好服務態度。因為想小食多餐，所以我都冇叫飯，只叫左紅油抄手，爽醬茄子同豆漿。紅油抄手既菜肉雲吞全由人手包製，雲吞皮冇鹼水味，菜肉餡都幾脹卜卜，菜味尚算濃厚。辣椒油唔太辣，但辣椒乾夠香脆，如果可以落多啲就好。夾醬茄子望落平平無奇，好似一般炸茄子，但食落原來幾特別，主要就係「夾醬」，蒜蓉味濃郁，亦有少少鹹香，新鮮熱辣時食更加好食。豆漿味唔算重黃豆味，都唔太甜。