翡翠拉麵小籠包

營業中

休息中

要係金鐘晚飯搵食，比想像中容易，可能係商業區又或者疫情關係，都唔駛等位直入。今次咁啱行過間小籠包店，諗起平時都少食，就試吓食餐。頭盤先食個雞絲粉皮，粉皮爽滑，啲醬又唔癡口，份量算正常，不過搵下搵下都唔多見啲雞絲。雖然無雞絲都食得好味，但係硬係爭緊啲嘢囉。跟住再嚟過雲吞，呢個做得唔錯值得推介，皮有啲厚但不至於硬，呢一樣嘢已經做得比其他好。𥚃面肉質新鮮，食起嚟都冇痴牙。呢個賽螃蟹就凍左少少唔夠熱，同埋味道差少少，因為蟹肉唔夠多，所以食起嚟冇蟹味又冇蛋味。唯有加少少陳醋，將味道提升番少少。呢個獅子頭就啱啱相反，好鹹～個獅子頭由裏面肉鹹到出外邊個汁。其實個肉質真係唔差，就係濃味咗啲。炒飯都係直得推介，平平無奇嘅炒飯，食落好有層次，一粒粒飯無癡埋又煙靱，呢個飯最緊要趁熱食，凍左味道就差啲。主角出場～小籠包，真正做到皮簿多汁，而且有肉香味，的確無丟佢嘅招牌㗎。至於呢個甜品桂花酒釀丸子，就唔多得，略帶古怪酸味，桂花又係唔多見。整體來講，食物質素唔差，不過味道偏濃，未必個個食得慣。而佢招牌嘅小籠包，真係唔失禮，其實佢仲有一個蟹粉小籠包，價錢又貴少少，不過都可以值得一試。