美心皇宮

營業中

休息中

太耐冇去有嬸嬸推點心車的茶樓食晏，嚟到呢度見有幾部車仔開緊工，第一時間揾炸物車，睇吓仲有冇插住把迷你紙傘的啫喱杯，答案係……推車嬸嬸們好有禮貌，掛住笑容開工，停車位置度過計過，唔會泊近客枱，放點心籠上枱時輕輕力咁，超體貼，讚！一部車仔同時賣五至六款點心，方便一次過掃貨，蝦餃就特別啲，由人手捧出嚟賣。鳳爪同牛栢葉的份量比一般酒樓的大，四個人食每人分到至少兩件。鳳爪有肉地，汁夠香濃，唔喺杰到似漿糊；蛋黃蓮蓉包個包好軟熟，冇黐牙，不過蛋黃大大個，蓮蓉少咗啲；叉燒包堅有叉燒，冇充斥肥膏同汁，爆口爆到好燦爛。驚齋食點快肚餓，加多個雪菜火鴨絲窩米。打開窩蓋，唔見面頭有漿糊獻汁；多鴨絲，食到有鴨肉味；湯底鹹度剛好，食完唔使立即灌水；每人分到足兩碗有多。守尾門邪惡甜品係焗布典同薑汁雙皮奶，鍾意雙皮奶夠薑同夠熱，甜度低過布典，同壽眉茶好搭配。壽眉茶香帶甘味，有餘韻，希望下次嚟可以回味。究竟有冇見到插住把迷你紙傘的啫喱杯，答案係冇喇。仲有幾多人會掛住或者知道有呢把迷你紙傘呢？即係咁，見到點心車，食得份外高興。