龍門客棧蛇羹專門店 (已結業)

之前有人介紹大埔呢間私房菜，今日黎開大埔做嘢就順便book位試吓。鋪頭有兩間，樓下嗰間做得比較耐，據聞有VIP房，今日坐樓上呢間新鋪，雖然無房但感覺好舒適，木器傢俬配吊扇，懷舊風味。成日以為私房菜一定價錢好貴，但呢度價錢好平民化，海鮮餐都只係每位$160 ，包括魚、蝦、貝殼類、肉、菜、湯和飯，相當豐富食到好飽。介紹吓今晚嘅菜式，有蒸黃腳立/黃花，蒜蓉開邊蝦、蒸象拔蚌（老闆話有時會係鮑魚！）、香蔥煎蓮藕餅、雞蛋鹹蛋蒸豬肉、蒜蓉炒生菜。海鮮全部都好新鮮，至於小菜都做得好好！老闆強調佢哋唔用味精雞粉，全靠天然調味，個「雞蛋鹹蛋蒸豬肉」甚至連鹽糖油都唔使落添！一路食老闆仲會同我地介紹點整，完全係家嘅感覺。同我地傾計嘅老闆係客家人，大廚師傅係順德人，所以菜式好多都包括客家菜，亦都有水上人嘅煮法。佢哋仲係屋企自己種月桂葉嚟沖茶，原來即係bay leaf,有好好嘅解毒能力，可以延緩衰老啊，仲有好多健康效用，記得飲多幾杯。