Hidden Table (已結業)

紅磡有好多隱世小店，而呢間都唔例外。主打多款特色口味嘅燒賣，有魚肉亦有豬肉。除此之外都有唔同邪惡小食供應。今次同朋友買咗幾款當宵夜食。由於食物即叫即整，需要等候一段時間。朋友鍾意食豬肉，所以要咗個黑松露豬肉燒賣。燒賣炸完之後外皮好脆，炸粉唔厚，食落唔油又唔膩，仲配埋醬汁可以慢慢點，性價比好高。薯條成日食，卷卷薯條反而比較少見，呢款叫Shake爆，可以選擇麻辣、紫菜或美國南部口味。薯條超脆，薯味突出，搭配紫菜好夾。魷魚圈反而有驚喜，出面通常咬唔開，呢度爽口又彈牙，配埋麻辣避風塘口味越食越上癮。而香炸珍珠雞亦係第一次見，四大塊，煙韌，美味。