影片
更多
2010-07-30
55 瀏覽
甚少涉足嘅牛頭角，今日探朋友關係，卒之走咗過哩淘大花園，晚餐就晌佢樓下嘅上海婆婆搞掂！星期六晚嘅上海婆婆，真係好旺，不過等位得哩總有望，因為佢哋規定個半鐘交枱（除非出面無人等位啫），清清楚楚，所以一般人都好合作，我哋都唔使半個鐘已經有枱，而差唔多夠鐘佢都會再問我哋有無嘢要，態度都OK，無話叫我哋埋咗張單先，或夠鐘叫我哋交枱，只係間接俾D訊號，好似我哋話無嘢要，佢就執一執張枱，我哋食完晒又見出面仍然有好多人等位，所以都好識做，埋單起錨！上海婆婆，新派裝修，唔會「光撐撐」，無老派上海菜館嘅影子，反而一室柔和燈光，牆上掛咗好多幅不同表情嘅中國大頭娃娃油畫，亦係佢哋裝修嘅標記，令個場有種和諧、親切感！唔知D大頭娃娃係咪就係上海婆婆嘅孫呢？！佢哋無乜賣貴價菜，多是常見、或傳統口味嘅上海菜。我哋5個大人，4個細路，左剔加剔點咗9道菜，3個前菜，3個主食類，加多3個飽肚嘢，茶芥每位$2，加埋一，成餐飯$592，兩個細路當一個大人食量，除勻每人$85，唔算貴喎。前菜出色有水準，花雕醉雞 $85，麻辣粉皮 $30，鎮江肴肉 $45，。- 花雕醉雞，唔識分咩幾多年陳嘅花雕，總之有酒香而感到醇厚易入口已覺得
上海婆婆，新派裝修，唔會「光撐撐」，無老派上海菜館嘅影子，反而一室柔和燈光，牆上掛咗好多幅不同表情嘅中國大頭娃娃油畫，亦係佢哋裝修嘅標記，令個場有種和諧、親切感！唔知D大頭娃娃係咪就係上海婆婆嘅孫呢？！佢哋無乜賣貴價菜，多是常見、或傳統口味嘅上海菜。我哋5個大人，4個細路，左剔加剔點咗9道菜，3個前菜，3個主食類，加多3個飽肚嘢，茶芥每位$2，加埋一，成餐飯$592，兩個細路當一個大人食量，除勻每人$85，唔算貴喎。
前菜出色有水準，花雕醉雞 $85，麻辣粉皮 $30，鎮江肴肉 $45，。
- 花雕醉雞，唔識分咩幾多年陳嘅花雕，總之有酒香而感到醇厚易入口已覺得OK，加上雞肉鮮嫩唔係冰鮮，合格有餘，仲要皮爽又無乜肥膏，酒香入肉，算係高水準！
- 麻辣粉皮，唔嗜辣，點都試咗少少，麻方面，花椒起到作用，但唔算好犀利，嗒落麻痺感好短暫，辣方面，屬中量級，係普遍港人接受嘅程度，加埋少少青瓜絲，更易入口，粉皮都算爽滑，一試無妨！
- 鎮江肴肉，小巧精緻，做法有少許複雜嘅小食，又要煮又要雪，又豬肉又豬皮，但做出哩個樣雖未致於晶瑩剔透咁誇，但就賣相層次有別，有D人真係以為直接晌豬某部份切出哩添。咬落，豬肉同半透明肉凍比例都OK，食落先有種啜牙嘅感覺。
主菜稍遜還啱食，樟茶鴨（半隻）$98、松子雞米配叉子燒餅 $58、松子黃魚 $108。
- 樟茶鴨，屬煙燻菜式，所以色澤比較沉實，燻味唔算濃烈，但鴨肉有獨特酥香，不過皮有D韌，而肉又有D嚡，唔係咁理想！事後上網睇番，原來哩道係個手工心機菜，先用多種調味料醃一大輪，再燻（可用茶葉、樹葉、稻草、木條之類）至上色，跟住蒸熟再晾乾，上枱前用滾油炸一炸，咁至做到皮脆肉嫩，又帶有煙燻香味，你話幾煩丫，下次再食哩味菜真係要用心去試！
- 松子雞米配叉子燒餅，松子雞米材料大概有松子、幼細嘅雞粒、榨菜粒，炒埋一堆，本身都幾惹味，而一碟份量都幾多，我哋散叫多一客凈叉子燒餅（兩件）$20先可以唔嘥D松子雞米。而叉子燒餅皮薄脆卜卜，朋友話係用兩種唔同筋性嘅麵粉搓成，搓好後唔知點樣對摺再對摺，焗出哩就變成中空狀，放滿松子雞米味道就啱啱好，否則，齋食松子雞米就稍嫌佢鹹咗少少。
- 松子黃魚，「婆婆」做得差咗D，因為係唔係「松子」賣相好重要，覺得佢畀花唔夠透、唔夠齊，炸出哩嘅樣稍為「岩蠶」唔夠突出，而且，粉漿厚咗D，因為食過有一兩啖成舊粉，好彩炸嘅火喉對板，魚肉脆嫩！甜酸汁底亦OK，醮咗哩食好醒胃！
卷麵飯樣樣都好食，銀絲卷（1蒸 $12，1炸 $13）、螺肉冷麵 $38、婆婆粒粒炒飯 $48。
- 銀絲卷，上海菜自己常叫菜式，尤其炸銀絲卷，外皮香脆，包心軟熟，都好少有失手咯，一定要點煉奶，無得講，個人喜好。
- 螺肉冷麵，盛夏食冷麵梗係首選啦，涼透心，加上之前又麻辣粉皮，又炸黃魚，食番個冷麵就最爽。冷麵做得幾好，口感爽，有韌勁，配上芝麻醬汁，香味一流，不過奇趣嘅事就係食「螺肉」嘅時候發生，D「螺肉」都切得好大條，隻螺咪好大隻？而且份量唔少添，但賣$38咋喎，原來係魷魚哩，醬汁煮過再切條，味道OK，點解叫螺肉冷麵原來有段古（有D侍應會答到你），我就俾8個趣佢喇！
- 阿婆粒粒炒飯，唔知係乜，一試無壞，哩到睇落幾似生炒糯米飯，當然佢唔係糯米飯啦，而材料有臘腸、蝦仁同蔥粒，簡單得很嘅一道炒飯，飯粒分明，色澤均勻，因為臘腸切到細細粒，唔會太覺肥，可能配叉子燒餅都得喎，下次再去要試試先！
食咗9樣餸，明顯，麻辣粉皮同樟茶鴨都係川菜啦，不過，無所謂，好食就得喇，反正佢個名叫做上海婆婆啫，無話自己係上海飯店，上海人都可以鍾意食川菜嘛！哈哈！
張貼
