小曼谷泰國美食 (教育路) (已結業)

元朗出名多街鋪有好野食。今日同幾個朋友去呢間小曼谷食泰國嘢。入到去樓面細細，但坐落四人位都ok。掃QR code落單，方便又快捷。所以一坐低，好快就有嘢食！去食泰國菜，當然要食生蝦刺身。6隻成隻手指咁長開邊泰國生蝦，識食，一定係加埋蒜片辣椒片，點泰式酸辣醬一啖食，非常鮮甜！加上凍凍地，熱辣辣天氣食真係好正。好快就到泰式炒金邊粉。食過其他舖頭，試過一係味道太濃，一係太酸又太濕，成口味精味！但呢度就炒得夠乾身，而且足料，讚！再嚟泰式肉碎生菜包。肉碎剛炒起夠哂熱唔會油淋淋，辣辣地好夠味，夾係山菜食剛剛好。加埋檸檬汁食，酸酸辣辣，真係多多都食得晒。終於到成餐重頭戲，鐵板蠔餅！同平時大排檔嘅炸蠔餅好唔同，因為用鐵板上， keep住溫度，唔會食食下凍咗搞到成口油。而且舖頭一啲都唔孤寒，勁多蠔仔，絕對值得再食！加上呢度侍應服務好好，好有禮貌，上菜速度亦唔錯，總體感覺值得再食。