顏府御膳 (已結業)

高質素嘅中菜真係好值得品嚐，呢間位於銅鑼灣Cubus嘅5樓高質素中菜顏府御膳新開冇幾耐，有好多款式嘅中菜菜式，有啲仲比較特別，如果唔想諗仲有幾百蚊一位嘅Tasting Menu感覺已經配搭得非常豐富。不過我朋友就鍾意自己選擇菜式，所以我哋就決定單點。糯米釀雞翼$68好得意，大大隻雞翼，表面都幾金黃，而且裏面有好多糯米，外皮香脆裏面質感軟稔，鹹香適中感覺都幾夾 ！花膠瑤柱羹$148每位味道比想像中清新，裏面都好足料而且一絲絲，有充足嘅口感，香味適中。野菌燒汁和牛粒$198裏面都幾多配料，除咗高質素黃牛粒，食落去有鑊氣之外，冬菇，扇菇，雞髀菇，蘑菇，豆角全部有齊，但係又唔會有傳統中菜的死鹹，唔會食厭。陳皮沙薑生煎斑球$268呢個上到嚟好正，仲係熱辣辣，佢成個鐵板咁樣上，本身應該都係仲係有少少生嘅，等一陣再食就啱啱好熟，口感最滑，冇骨，而且陳皮沙薑呢個組合非常匹配，鮮味十足，表面本身有火槍「辣」過，賣相都一流！水牛蝦醬唐生菜$138呢個菜式賣相又係好正，嚟到熱騰騰可以自己撈下佢，又係做到啱啱好熟，水牛蝦醬有輕微辣香，唔會悶，唐生菜亦都有充足水份及甜味，作為中菜嘅菜品都好爽口易食，大人細路都啱