金鶴拉麵 (九龍城道) (已結業)

拉麵不嬲都鍾意食，喺屋企淨係可以煮公仔麵或者食杯麵，已經食到好厭，但係疫情嚴峻又唔敢出街食，咁不如真係叫返個拉麵外賣！呢間拉麵好出名鰻魚飯同埋佢個雞白湯拉麵，今次就外賣自取帶返屋企同屋企人一齊開心share。三個人就分別揀咗三個湯底包括雞白湯拉麵、黑蒜醬油拉麵及醬油拉麵。攞到返屋企其實啲湯底仲係暖，不過我自己就會建議加熱返個湯底，會更加好食。不過拉麵同埋啲肉就唔好加熱，裏面嘅豚肉同埋慢煮雞胸保持返而家個質感係最好食，一加熱就會變質。將個熱辣辣嘅湯倒返落拉麵就可以。講返湯底先，雞白湯味道好香濃，好似牛奶咁嘅質感，好好食；黑蒜醬油就香味突出，比較濃郁；醬油拉麵帶有鹹香，如果想食基本口味嘅可以試呢款。拉麵方面都唔係剩係得拉麵，裏面有木耳、筍、蔥、糖心蛋半隻、紫菜、兩片慢煮雞胸及一片豚肉，好豐富，一個女仔應該會食唔晒。糖心蛋好香甜而且唔會太鹹；慢煮雞胸好滑，豚肉都一樣，講肉類絕對好食過座X。而且有咁豐富嘅其他餸，食極都唔會覺得齋。拉麵都仲保持應有彈性，唔敢堂食就不如外賣自取返屋企慢慢嘆啦！