富臨薈 (已結業)

見沙田開咗間新食肆，已經好想去試吓，今日終於有時間，一於就去試新嘢喇！食肆標榜係fusion菜，裝修都好隨便吓，有啲似茶餐廳，冇問題嘅，最緊要啲嘢好食啫！睇吓個餐牌，啲嘢都唔平，但乳鴿好似好抵喎，只係賣25蚊一隻，就叫咗兩隻乳鴿，加個 龍鬚炒芥蘭，食個鍋燒生煎包，同個鴻圖超脆麵，兩個人都夠食喇！茶送咗嚟，雖然有個銅茶壺，但係用玻璃杯，而且冇茶味，似足茶餐廳，是但啦，當去茶餐廳食囉。啲餸嚟喇 ~ 隻乳鴿嘅外型都唔錯，不過食落冇乜味，一定要點鹽，否則淡茂茂。食下個芥蘭， 個樣好靚，切得好特別，炒起嚟有啲似螺旋形， 青青綠綠，我好鍾意，可惜唔熱，一啲鑊氣都冇， 亦都係無乜味道。試下個生煎包先， 居然個皮係淋嘅，一啲都冇煎過嘅感覺， 裏面啲餡亦都係唔夠味。食埋個脆麵，炸得幾脆，上面有啲橙色嘅醬汁，以為係甜酸醬，點知唔甜唔酸，唔知係乜嘢？淨係知道冇味道。食完呢一餐，得出嘅結論係-----呢度啲食物得個樣靚，但係全部味道欠奉，鍾意post 相嘅人就嚟呢度朝聖喇，但係鍾意食味嘅就要諗諗喇！