好燒味 (已結業)

之前新年食開年飯阿媽一向都會買燒味做餸，年年都食開同一間，咁今年就同阿媽建議，不如試下其他地方嘅燒味。之前有食過好燒味嘅飯盒，覺得個叉燒好淋，經過慢煮嘅豬肉，真係唔需要太多肥肉去令到叉燒口感唔乾柴。跟返往年嘅做法買咗幾款唔同燒味返去，有豉油雞、燒鴨、叉燒、燒腩呢4款。叉燒經過慢煮，淋身帶有少少咬口，肉質保持濕潤，完全唔韌，阿媽都話好好食。豉油雞普普通通咁啦，唔差但係又講唔到有咩特色。燒鴨唔會太肥，無乜脂肪，肉質紮實唔錯，外皮都燒得幾香，唔錯。燒腩仔係半肥瘦，皮仲keep到好脆，呢個係食燒腩嘅重點，點黃芥辣食可以食多半碗飯。