一起果醬

每次經過都好想試💛一起果醬呢間餐廳！除咗俾佢各種口味嘅手工果醬吸引，仲因為餐廳成個設計係清新嘅田園風，一入去仲有貼滿memo嘅連儂牆，相信已經俾唔少人懲罰過！由於太肚餓嘅關係，我哋嗌左兩個Tea set之後，仲叫多咗半份豬肋骨同一份鬆餅🙈🙈



🌿士多啤梨果醬燒豬肋骨 $109

除咗燒豬肋骨配士多啤梨果醬，配菜仲有沙律菜同埋薯角。豬肋骨嘅味道比較淡，由於煮得較熟，肉質好稔，食嘅時候骨同肉已經分離，唔需要用手食都得，配埋士多啤梨醬都幾夾！個人比較喜歡薯角，炸得好脆，味道都好好！

士多啤梨醬燒豬肋骨

$109

🌿 手撕燒豬肉野菌忌廉湯長通粉 配玉桂蘋果茶 $58

呢個野菌忌廉湯長通粉意外地好味！通粉好軟身，手撕豬肉質都幾滑，但最好味就係個湯底！有好香濃嘅菇同忌廉味，唔知係因為太餓定真係好好味，我哋最後連湯都飲埋😂😂 玉桂蘋果茶味道甘甜，有清新嘅蘋果味，夠解渴。

手撕燒豬肉野菌忌廉湯長通粉

$58

🌿果醬奶油窩夫 配冰糖木瓜雪耳 $58

相比鬆餅，呢度嘅窩夫就稍為遜色，雖然焗得幾鬆脆，不過味道比較淡，冇咩蛋香味。
木瓜雪耳好好飲，有木瓜粒同雪耳碎，好似木瓜糖水一樣。木瓜粒鹹鹹地，味道好得意🙈

果醬奶油窩夫

$58

🌿英式鬆餅 配蛋黃菠蘿果醬 $22

個人非常推介呢度嘅鬆餅！我哋叫咗蛋黃菠蘿果醬味道嘅果醬配鬆餅，蛋黃夠香濃，同菠蘿非常夾，味道極似蛋黃鳳梨酥🤤🤤 係必試嘅口味！

英式鬆餅

$22

🌿小結：
呢度唔單止環境舒適，食物質素都令人非常滿意，特別係各款嘅果醬，同環境一樣咁清新☺️下次嚟會一定試試其他果醬！如果大家食完覺得好味，仲可以買佢哋嘅手工果醬返屋企添。