覓茶活 (已搬遷) 新店位置

聽朋友介紹石門新開左間好正既台式飲品，仲有我最愛既紅柚茶，趁今日放假，即刻去試下。一出東鐵站口，對面就係京瑞廣場一期，商場上2樓，係右邊角落就係覓茶活既位置啦。成間鋪既感覺好舒服，平時買開依啲飲品鋪，通常感覺都係間鋪好細，排隊等位好迫，望入去會有密集恐懼症😂不過依間鋪好闊落，又用藍色做主色調，感覺好舒服。等飲品期間，仲有潛水片睇，聽店員講，老闆係一個專業潛水教練添。今日同朋友仔孖住去， 朋友叫左杯鮮百香紅少甜同鹽酥雞。杯百香果好好味，好香，不過朋友話飲既時候，有啲百香果果核有啲酸，反而感覺幾真材實料😂唔係用罐頭貨👍🏿另外個鹽酥雞超好味，香口得黎又唔油，絕對推介👍🏿👍🏿而我自己就當然飲我至愛既紅柚綠啦🤤仲叫多份雞旦仔添。朋友果然冇介紹錯，杯紅柚綠好正，味道剛剛好，唔會死甜，又香柚味，讚👍🏿👍🏿至於個雞旦仔，每粒都好飽滿，唔似平時嗰啲好似食風咁😂只係差少少脆度，不過都幾好味。見到其他人有加雪榚，下次再去要試下先😍雖然石門站唔算係一個非常方便既地方，不過店鋪質素頗高，一定會再黎食，推薦👍🏿