金堂韓國料理 (已結業)

我相信係香港都好難搵到一間咁正宗、咁好食既韓國菜。星期日我同我個朋友去西貢玩，我朋友話肚餓咁咪去條食街度搵食，見到間韓國菜館地方細細但係好多人，所以就決定試下，入到去叫個招牌菜石頭飯、人蔘雞湯同埋個蛋包蝦，簡直係食唔停口呀。個石頭飯好足料、撈飯既醬又好食、仲要加埋飯焦，好味。而個人蔘雞湯好得、無味精，一飲就知道煲好耐，好出味。個蛋包蝦好大隻，肉好爽，正﹗﹗﹗我見隔離有人叫個泡菜炒豬肉，好香，下次我一定會試下，因為個度仲有好多食。除食好味之外，就連飲品都好正，尤其是係個柚子荼，我地飲個時，個老闆娘行出來，叫我地要連埋柚子食埋，佢話原來佢地柚子全部都係佢奶奶親手種，係韓國返來，一年先收成一次，唔同我地係出面買一樽樽加工過個。佢地泡菜都好好食，我臨走仲買一磅呀。價錢又適中，好抵食。我都有去過韓國旅行，食過當地既韓國菜，但係都好似無呢間咁好食。