韓牛韓式燒烤 (已結業)

由於前一日同好朋友喺創興廣場食日式晚市放題預備上2樓嗰陣，見到喺1樓有間新開張嘅「韓牛韓式燒烤」，都諗著搵日嚟食，咁啱喺今日下午我們同姨媽仲有表姐飲茶嗰陣，表姐話好想食韓燒，所以我們就去咗旺角創興廣場食韓式燒烤晚餐！一入到去見到店內嘅環境裝修比「前身」嘅光猛同乾淨衛生咗好多，食物種類亦比「前身」嘅多，除咗有燒烤嘅肉類牛仔骨、牛肉、豬扒、豬肉、鷄肉、鷄翼等等等等⋯⋯當中嘅牛仔骨醃得相當香甜入味，肉質好鬆軟，而且有好多肉汁！三文魚刺身非常新鮮，肉質相當肥美嫩滑！凍蝦嘅肉質好爽甜彈牙，而且都幾大隻！熟食嘅就有泰式炒蜆、熱湯、韓式炒粉絲等等等等⋯⋯泰式炒蜆嘅醬汁好香辣惹味，比平日食開嘅豉汁更加帶出到蜆肉嘅鮮味！而甜品嘅就有甜品專櫃、雪條、豆腐花等等等等⋯⋯而最令我們驚喜嘅係有朱古力噴泉同可以自己整自己鍾意咩味道嘅綿花糖機，呢樣係最令到在場無論係大朋友定小朋友都好開心！另外！值得一讚嘅係他們供應食物嘅態度非常好，會不斷咁供應，令人客食得相當放心！