NeNe Chicken (東港城) (已結業)

星期二偷懶冇煮飯，心思思想食炸雞，咁返屋企近近地同亞仔兩支公去對面商場開餐，阿仔最近迷上B T S，約佢食韓國嘢一口就應承。呢間鋪唔係開咗好耐，今晚又唔係好肚餓，所以只係叫咗兩樣嘢食同埋一支梳打兩份飲。雙重滋味炸雞 - 阿仔叫咗無骨，我自己平時就鍾意食有骨嘅雞多啲，可以選擇兩款炸雞，阿仔揀咗韓式甜辣炸雞，我就揀咗白郡主炸雞，即係白汁洋蔥，兩款都好好味，雞肉唔會太肥，果皮炸得好脆，唔會鞋口，甜辣醬小小辣偏甜，個汁唔會太杰身，不過我都係鍾意白汁洋蔥多啲，始終食炸雞有啲滯，值得一讚嘅係，咁大盤雞都只係＄173，但係每款有成七，八舊，真係好抵食！明洞小食派對 - 一邊係炸嘅小食，令一邊係辣汁魚糕串陪雞蛋加芝士蔬菜，最正係炸嘅小食有渣年糕，炸紫菜粉絲卷，迷你餃子，同埋炸蝦飯卷，炸蝦飯卷上面有沙律醬，我就鍾意點隔離果盆辣汁，勁好味！原本冇諗住要嘢飲，後尾都叫咗一支梳打，super berry口味，唔會太甜，好解渴！今日只係食到兩樣嘢，見佢仲有好多食物選擇，價錢唔貴又咁近屋企可以成日嚟開餐！