鮨月 (已結業)

今日同朋友去咗鮨月食omakase，呢度嘅環境非常好，好有日本特色，我哋今晚可以坐到吧枱，見着廚師點樣去為我地準備食物。刺身:真鯛呢個魚切得薄薄地，口感幾爽幾煙韌，配上淡淡嘅柚子胡椒，係好唔錯嘅開胃菜，而且好新鮮！北海道岸蠔呢隻生蠔係日本直送，即叫即開。食落仲有淡淡嘅海水味，亦有日本蠔嘅嗰種鮮甜。唯一美中不足就係唔算太大隻。粒貝刺身個粒貝非常新鮮，配上自家磨製嘅wasabi，超級鮮甜，而仲有一個裙邊，係預先燒過嘅，比較煙韌，亦都好好味。吞拿魚拖羅蓉配下面呑拿魚赤身，真係唔捨得一啖食曬，配啲蔥花同埋芝麻蓉，調味剛剛好，呢個亦都好出色。呢個叫冰頭漬，即係三文魚嘅咀再用醋醃咗，食壽司之前，用呢個清清個味蕾，真係超級開胃。壽司：有五款壽司，分別係魴鮄，青羽太，蓮子鯛，赤蝦同大拖羅。每一個壽司都配唔同嘅醬料，好似魴鮄就配梅子蓉，青羽太配柚子胡椒，蓮子鯛配辣蘿蔔蓉。呢三個魚嘅味由淡食到濃，都非常新鮮。赤蝦壽司上面配埋一啲海葡萄同埋松業蟹膏，勁好食！其中最吸引嘅係大拖羅 。望落去已經勁肥美，放落口真係入口即溶！！最後當然仲有天婦羅，個炸皮非常薄，非常出色。仲有燒雞泡魚，無骨啖啖肉，都幾好食，送酒一流