八方小籠包 (已結業)

北帝街開咗間新嘅舖頭食上海嘢，因為好鍾意食小籠包所以去試，當時嘅小籠包味道ok但係皮好厚，所以食過一次就冇回頭。到咗父親節爸爸話想食小籠包，附近又冇乜舖頭食上海嘢，所以近近地又去返呢度食話明食父親節飯，冇理由淨係食小食同湯麵呢啲，見openrice有人話呢度有得訂紅燒元蹄，就早兩日打去舖頭訂，$328價錢唔算好平不過即管試下估唔到元蹄勁大隻，最估唔到啲肉好冧，連瘦肉位都唔硬唔韌，味道仲好好，我哋一行五人清晒咁滯再嚟係炒鱔糊，鱔有咬口唔會冧晒爛晒，味道亦唔錯。跟住再食小食(都唔知點解會調轉咗嚟叫，食完主食先食小食🤣)，叫咗小籠包、炸饅頭同香辣粟一燒(見個名好得意所以叫嚟試下)，估唔到小籠包好食咗好多！！！皮薄多汁！同一開始嚟食嗰陣完全唔同！老闆過嚟吹水話換咗點心師傅，唔怪得完全唔同晒啦！最後我哋五個人叫咗四籠小籠包😂。炸饅頭炸得幾靚，又夠大隻。至於香辣粟一燒原來係辣椒炒粟米，因為粟米夠甜所以唔會好辣，我唔太食得辣都食到甜品就冇叫到高力豆沙，試咗佢哋推介嘅流沙金球，原來係煎堆入面包住流心嘅汁，見到金球二字以為係鹹蛋黃味，點知食唔到鹹味，甜甜地，金黃色嘅醬仲食到少少椰汁味，估唔到甜品都有驚喜