專業咖喱皇 (已結業)

尋晚朋友仔話想食印度烤餅，於是就決定去佐敦搵咖喱店(因為未試過)。大約9點幾黎到，感覺幾寬敞因為冇咩客。每張桌上都放左一卷紙巾，一個水壺同一大疊紙杯，雖然唔係幾環保但就保證清潔，而且感覺好自助。真係有好多唔同既咖喱選擇呢，女店員推介我地要一個乾一個濕，結果要左匈牙利牛柳乾咖喱配烤餅同埋印度咖喱豬扒配白飯。匈牙利牛柳乾咖喱冇咖喱汁既，佢地應該係將咖喱膽炒乾再同牛柳同煮吧。呢味唔太辣但就好香，牛柳好腍，但亦比較乾身。印度咖喱豬扒比較辣，尤其係D辣油。豬扒同樣係好腍身，肥既部份都唔少，我覺得好香口好好食呢！印度烤餅同平時食既有D唔同，唔係naan而係rotti，比較厚身D同鞋口D，感覺不過不失啦，朋友仔都話一般。雖然佢地D咖喱談不上好正宗，但係整體感覺都唔錯，份量足(我個人覺得)而且價錢相宜，店子都算乾淨企理，店員都好nice，有機會既話會再去吧。