你妳 (已結業)

你妳終於喺紅磡開咗分店，趁今日放假決定同朋友一齊嚟試吓。我哋兩個人要咗兩份吐司同埋兩杯嘢飲share。肉鬆芋泥吐司超大份好足料，肉鬆同芋泥嘅份量都好多，聞落超香。吐司烘到脆脆地，芋泥甜度適中，肉鬆夠香口同鬆軟，三樣一齊食，口感好豐富，喺附近返工嘅話，真係可以當一個lunch咁食。鐵板芋泥炒蛋芝士吐司都係好大份。軟熟嘅芋泥同原本就係perfect match嘅炒蛋芝士吐司好夾，食落有好香芝士味，適合鍾意惹味少少嘅嘢食嘅人食。熱手作紫芋牛奶聞落真係好香芋頭味，同牛奶嘅比例非常之好，同吐司好夾，暖笠笠咁，好適合冬天飲。凍高雄紅茶牛奶小芋圓係店員推介嘅，都幾大杯。紅茶牛奶好好飲，入面有齊芋圓、地瓜圓同埋珍珠，芋圓同地瓜圓都好香，口感好好。