嫲嫲雲吞雞 (崇齡大廈) (已結業)

開喺翠華餐廳隔離，多年來都係開食肆，但係好多都挨唔到幾耐，之前就開左間嫲嫲雲吞雞。貪佢就腳就過來試下。都係叫左個招牌既雲吞雞，有好多唔同口味，叫左個冬瓜薏米湯底。雖然話係四人份量，其實個意思係比四個人分，但以食飽論既話，只夠食飽兩個人.因為我地有四個人，於是另外再叫多兩味餸，一個黑醋小排骨，同一個雪菜炒粉皮。雲吞雞先到，飲一啖湯，好燙口，幾醇，但唔係特別鮮甜同好飲。雲吞一般，因為出面熱個餡唔熱。雞肉唔算滑嫩，但配合埋豉油同辣椒豉油係幾好味.相比之下，反而是其餘兩款小菜的質素更令人驚喜。雪菜炒粉皮有啲偏淡，但係粉皮炒得岩岩好，爽滑有彈性，而雪菜同微辣既味道很是惹味，我最後清哂成碟。而另外一個黑醋小排骨就堅好食，顏色鮮亮，熱辣辣呈桌，酥香軟嫩，微酸可口，十分之高質嘅小菜。用來送飯一流。其實依間野嘅前身係嫲嫲辣辣，個陣時都唔少幫襯午市，有時會食晚市，個小菜嘅質素一直都keep得唔錯，川菜有一定水準。一脈相承，依間雲吞雞反而唔太推介，如果黎食嘅話，推介食小菜，真心唔錯。四個人食左200幾蚊，除開每個人60蚊以下。不過係新開張先有嘅八八折優惠，之後就可能冇咁抵。