越粵棧 (已結業)

今晚幫襯呢間位於九龍城嘅叫餸食飯，叫咗西湖牛肉羹、雞油炒豆苗、煎雜魚同埋煎韭菜餃。可能啲豆苗未係時候，所以個雞油炒豆苗硬係覺得同想像中有啲距離，等再遲多一排啲豆苗靚啲嘅時候應該好食好多。煎雜魚好好食，一份有四條，今晚嘅雜魚有三條䱽魚仔一條細黃花魚，煎得好香脆又夠鬆化，連魚尾、旁邊啲骨同埋個魚頭都炸到脆卜卜，而且又唔算多油。煎韭菜餃都竟然係一個餸仲要係廚師推介我都覺得有啲奇怪，不過識落個味道又真係唔錯，啲韭菜餃應該係自己包嘅，所以啲餡料好新鮮，略嫌韭菜餃入面嘅韭菜唔夠多，如果韭菜多啲應該會再香啲。西湖牛肉羹個味道都OK，個芡汁令到個牛肉羹幾滑，下次要試埋粟米魚肚羹。