鬼滷 (已結業)

朋友相約收咗工食晚飯，佢之前來過，所以推介食打冷，鬼滷地址就響銅鑼灣駱克道459-461號THE L SQUARE 21樓。當上到去𨋢門打開，西餐廳風格完全估唔到食打冷嘢！店員安排入座，好快小食（爆谷）放咗上枱，落咗單傾吓偈。好快潮式滷水拼盤就到，碟底有個環保蠟燭，着住火用嚟助熱住啲食物，避免食落口凍冰冰的感覺！先試鵝片皮甘香肉嫩，豬肚爽脆得來唔會難𡁻，豬仔髀啖啖肉香，豬腩肉肥瘦均勻唔會太霖， 滷水墨魚爽脆得來夠鮮味。呢五樣嘢響打冷來講一定要叫！鬼滷做得平凡之中比較出色，保留原味嘅鮮味，滷水味唔會重，值得欣賞。蘭王蛋蠔餅，我知道製作是半煎半炸，賣相相當吸引，當放入口入邊外脆內軟，蘭王蛋蛋香蠔仔鮮嫩多汁，整體味道好豐富。黑松露蔥油拌麵，好惹味麵質爽滑，黑松露蔥油香掛上麵條，令人食上癮。鬼滷非一般潮式酒家食嘅打冷，真心推介。