木玥巷 (已結業)

今日有個財主請我食飯, 佢話佢最近食過呢一間台式餐廳嘅午餐話幾好食. 咁我哋放工就即刻過咗嚟, 估唔到於平日時間六點半到, 裏面已經滿座要等兩張枱. 講真餐廳唔算大, 但裝修都幾有台式文青風格. 其實佢嘅食物唔算多. 主食有六七個左右, 我覺得咁先可以精深煮到每一款食物都好食. 台灣嘢我例牌都食台灣牛肉麵. 佢牛肉麵湯底唔算太鹹, 所以會畀咗啲梅菜你加落去. 我第一次食台灣牛肉麵會有白烚肥牛同埋炸豆卜串, 同埋鹵水過牛展. 其實幾樣嘢夾埋一齊都唔覺得奇怪仲好食, 尤其是嘅豆卜串脆卜卜. 至於朋友就食咗個黯然銷魂安格斯魯肉飯. 聽過名真係唔知佢牛定係豬. 其實係用牛肉粒再加煎蛋仲有少少免治牛肉, 我試咗啖真係唔錯, 尤其是佢隻煎蛋煎到蛋邊有少少焦燶. 至於鹽酥雞係連皮一齊咋, 雞脾炸到香脆但係肉質又保持到嫩滑, 加埋柚子汁仲有種清新嘅感覺. 最後同朋友各有一杯特色飲品, 柚子同埋菠蘿嘅水果茶, 裏面水果都係夏天水果為主, 我覺得特別係加咗啲百香果, 咬落去啲核都幾有得意. 價錢方便就見仁見智, 我朋友覺得ok我就覺得有少少貴. 如果想抵食嘅話可以午市來食下.