悠蔬食 (渣甸中心) (已結業)

星期五夜晚，約左三位好友一聚，友人係菜怪，一早提議食素。未上到餐廳，先要排長長的隊等𨋢。餐廳唔似一般素食餐廳，採西式裝潢風格，襯埋淺藍色主調，幾優雅。上到去時尚早，未坐滿，食食下坐滿晒，估唔到咁多人鍾意食素。佢有dinner set，基於咩都想試，唔諗喇，一人一個餐啦，反正散叫都差唔多價錢。先上三大盤前菜，中間盤日式藜麥薯球好讚，食落好似食凍薯蓉咁，加左粟米藜麥好有咬口。兩款湯都有叫，個人比較鍾意周打忌廉湯，好濃好滑，同時好飽肚。兩種手卷，牛油果好食，食到呢到都仲未到主菜主菜分別叫左獅子頭、南瓜紫薯鮮豆包千層麵、松子菠菜汁意大利飯同埋蕃茄扁意粉。碟碟份量都幾大，我最鍾意獅子頭，做得好似又夠味！意大利飯都好食，口感清爽。其餘兩碟我只係食左小小，太飽。最後仲有點品，我揀左芝麻膏，好香芝麻味，實淨得黎唔會好硬。最後要提我地叫左四杯野飲都好好飲，推介五穀杏仁奶。總括黎講都係一次食素新體驗，幾個人去可以一齊試多幾款，埋單一人二百五咁上下，但飽到要打包。