SHAKE SHACK (ELEMENTS圓方) (已結業)

睇到個標題，係咪覺得有啲誇誇其談呢？🤣但之前睇過個文章講話佢係美國嘅前總統奧巴馬都好鍾意食嘅漢堡包店！Shake Shack喺香港到開到成行成市，一直都未有機會食到。今日經開圓方，就一於試吓佢啦！😜今次點左一份Single Shack Burger同埋炸薯條。店員喺收到order之後馬上製作，等咗冇幾耐熱辣辣嘅漢堡包連同一大兜嘅炸薯條就已經整好咗。🍔漢堡包係用一個比較軟身嘅包做皮，新鮮嘅蔬菜連同一大塊熱到溶溶地嘅芝士，仲有由視覺上睇落已經覺得係優質嘅牛肉漢堡扒，真係睇落已經流晒口水啦。🤤由於我依個係單層漢堡，唔難一口咬晒咁多層嘅漢堡，嗰種半溶嘅芝士連埋一個好香又多汁嘅牛肉漢堡扒，有入口即溶嘅感覺，亦覺得依種配搭非常之夾！😍金黃色嘅炸薯條，係一種條紋裝嘅粗切薯條，一路咬下漢堡一路點下茄汁醬食下薯條，享受一個高質嘅美式快餐，都幾正㗎。不過今次冇試到佢嘅奶昔，下次搵機會再試啦！😎