四季常餐 (已結業)

之前睇YouTube介紹，覺得主打食常餐既餐廳幾特別。記得中午總係好多人，今次晚上黎試，唔洗排隊亦唔full。一個人的晚餐，叫左常餐“茄牛通配炒蛋多士”。上餐速度十分快，兩分鐘就黎齊。賣相確係唔錯，炒蛋色澤深黃，多士烘得岩岩好，齋睇賣相係幾令人期待。點知先食一啖茄牛通，心諗“哎呀，伏左！”茄湯偏酸，一入口就知用左茄汁茄膏，如果全部新鮮蕃茄係唔會有咁既酸味，當然廚師一定有用鮮蕃茄煮，但唔會係我中意果種純蕃茄味。牛肉三四小片意料之中，入口只食到醃味同鬆肉粉既味，唔滑有筋。到食最期待既炒蛋，一食第一啖，又伏左。唔係唔好食，個蛋係濃既。但炒得太生，大約半成熟多少少（睇相就可以見到好多生蛋白吊下吊下）。靚既炒滑蛋唔係一味唔熟就叫滑，功夫好既，可以炒到7-8熟但入口好嫩滑（其實好多餐廳都做到，比如翠華，生記）。再望望對面食客份炒蛋，又炒得熟得齊，證明廚師唔穩定。如果四季常餐唔係主打常餐或滑蛋，呢一餐我會比佢合格，但如果打響旗號賣常餐通粉炒蛋，我覺得咁樣既質素係唔合格的。以蕃茄通黎講，個人認為中環勝香園，尖沙咀星座冰室更勝一籌，係切切實實既鮮茄味道。炒蛋的話，翠華，生記，澳牛，樂香園（蛇竇）都比佢好