時光流逝，小店愈做愈大，花款愈來愈多。登龍街開業後幫襯過幾次，水準雖有下滑但味道仍是合格的，偶爾支持回憶也當回憶當初的感動。但疫情影響，收店時間提早了，夜遊人的我近兩年都無再幫襯…直到昨晚（28/2），全城除罩的前一晚，神推鬼㧬之下，食咗相信係最後一次嘅樂湯雞…
一份口水雞，一碗花膠雞湯粉絲。
口水雞上枱就知出事，口水醬色澤偏淡，無辣椒粒，一睇就知係大陸平價醬。花生量少，雞皮深黃，肉質韌，懷疑是熟食來貨或隔夜，睇見都唔開胃。
花膠雞湯一望也看得出比之前的淡薄，但入口仍算ok，最大問題是配料，雞肉較口水雞更差，嚡口無味，完美的刷膠口感；花膠連鱈魚膠都稱不上，浸發到極大嚿但零味道，且口感偏硬。一碗八十幾蚊，份量尚可，但一餐飯的飽足除了份量還講求味道，單是這點已經令身為開業Fans的我大失所望…
「店做得愈大，味道自然愈差」大概是本地食店的不變真理。言而食客也有自己選擇的權利，花膠雞近年也新開了不少小店，當小店失去初心，我又何必戀棧回憶？一口氣打了五百多字告別文，也算對得起這回憶的味道吧。
