[山椒墨魚咀]
一上枱見到墨魚咀的數量有啲驚嚇，目標都至少有50粒，墨魚咀的Size相當較細，好方便可以一次過食幾粒。墨魚咀的炸粉比較薄，做到外脆內軟的效果，配埋山椒的調味，增加到椒麻的味道，作為前菜幾開胃。
[大大塊芝士流心麥樂雞]
麥樂雞平時就食得多，咁大塊仲有芝士流心就真係第一次。免治雞肉食得出有餣過，都幾還原到平時麥樂雞的味道，加埋流心芝士令味道同口感更加提升。
[炭燒雞肩肉]
雞皮燒得夠香脆，由於用雞肩肉，所以肉質唔鞋，而雞皮與雞肉中間的油份保持到Juicy的質感。Size亦切得岩岩好，可以好方便一口咁食。
[魷魚墨魚棒]
食落去夠晒彈牙。雖然只係一串串燒，但份量都幾大，兩個人Share 岩岩好。
[日式叉燒併溏心蛋丼]
主食方面都有唔少選擇，其中日式叉燒併溏心蛋丼都幾吸引。叉燒肥瘦分明，比較嫩滑，而餣叉燒的醬汁同平時食燒味的唔同，近似日式燒汁，加埋溏心蛋送飯一流。
[壽喜燒牛肉撈烏冬]
有時食日本肥牛，最驚係太肥或食到雪味。但呢度的肥牛處理得幾好，肥牛唔會只係得肥羔，同時食落去都入味。醬汁相對上多，所以每條烏冬都掛晒汁，加埋大蔥一齊食都幾惹味。
[蔆蘿汁‧蜜桃蘋果汁]
果汁用啤酒杯裝，都算大杯，價錢亦都實惠，唔使$30就叫到一杯。
整體而言，餓居日式居酒屋環境幾舒服，好似置身係日本一樣，食物質素亦唔錯，價錢都算合理，唔收加一，同時地點方便，太子站一出幾分鐘就到。如果約埋三五知己傾下計、食下野都係一個唔錯的選擇。
