陸陸雞煲火鍋 (已結業)

三個人食飯食雞煲就岩晒，可以叫多啲配料又唔怕會飽死。今次係第一次黎陸陸雞煲所以叫咗個招牌陸陸雞煲試試。驟眼睇佢地既配料選擇都有成一百款，有啲仲好特別，我地點咗百花&鹹牛肉釀油炸鬼,玉子,珍寶帶子同手切肥牛。因為三個女仔食量唔大，為咗試多啲唔同既配料，今次叫咗例牌份量既雞，雖然有啲唔夠喉但最後食埋其他野都好飽。呢到既雞煲同一般食既味道有些少唔同，除咗鹹同辣仲有啲甜味同麻香，味道唔錯又唔會太鹹，調味配料豐富，見到有洋蔥、芹菜、莞茜、八角、花椒、京蔥、青椒，香得黎有層次。我幾鍾意佢將雞件斬成一大舊，啖啖肉唔會碎濕濕。雞肉鮮嫩，就算係雞胸都完全唔un唔鞋，係靚料雞。手切肥牛無得頂，雪花分佈平均，食落肉質軟滑，充滿油香同濃郁牛味。雞煲打邊爐食玉子真係第一次，幾與別不同既的食法，玉子帶少少甜再吸晒雞湯既味道，軟軟熟熟。珍寶帶子新鮮無雪藏味，帶點鮮甜。百花＆咸牛肉芝士釀油炸鬼又係好創意既配料，店員提醒呢個係未全熟叮囑我地要煮一陣。百花餡好足料，非常爽口彈牙，並唔係成口粉漿；咸牛肉芝士味道都唔錯，不過我覺得有啲膩，鍾意咸牛肉既人會大愛。兩隻餡同油炸鬼都好夾。青檸梳打不過不失，同雞煲係絕配。