廟街小廚 (已結業)

開頭諗住去興記食煲仔飯，點知興記要初九先開工。呢間廟街小廚開枱開到響興記門口，諗住都係食煲仔飯，應該都唔會差得去邊，就咁坐低叫咗三個煲仔飯，之後再加多個蠔餅。再望下openrice啲食評全部都係bad。心諗冇咁橋又中伏？跟住個蠔餅嚟，都算中規中矩。我哋五點幾鐘去到等到成六點半都仲未有煲仔飯出嚟，心諗有啲唔對路周圍望下見另外幾台都冇煲仔飯，淨係得蠔餅。再等多陣同阿姐講唔掂喎，七點幾㗎喎仲要等幾耐？阿姐答我係好快呀就嚟就嚟，正常等都要六七個字啦。但其實我係第3台客我唔明點解我唔係一個正常嘅等。再等多一兩個字其他食客都有啲鼓譟，話要埋單走跟住見到有個疑似老細嘅男人同阿姐講，唔等得就唔好食囉！叫佢哋埋單！於是乎我同阿姐講話，咁我唔等喇埋單啦。阿姐馬上收咗我個蠔餅嘅錢。我覺得呢間嘢千祈唔好幫襯，除非你有大把時間大把人生去等。