牛角次男坊 (荃灣廣場) (已結業)

用餐程序係咁：首先要好似大家樂咁先喺門口排隊落單畀錢（而加一服務費係照收🤷🏻‍♂️），然後職員會帶你入座兼大叫「213214」。職員迅速為你送上半熟蛋同麵豉湯，想飲水就要自己去斟（而加一服務費係照收🤷🏻‍♂️）。等食飯時可以玩下摺紙，筷子套上圖文並茂，教你點樣摺筷子座。次男坊丼係砌得幾靚仔，白飯鋪底，再用芽菜堆成山丘形態，牛肉再鋪面。見到隔離位走芽菜，個牛肉山就矮咗一大截。整體味道ok，只係辛口汁一點辣味都冇，同啲汁埋流晒落最底，令底層嘅飯濕咗啲。講明先，員工態度係絕對冇問題，手腳都勤快，不過公司政策有問題，落單要企住等，斟水又自助，牙籤自己拎，大家樂式嘅用餐模式都夠膽收服務費，唔通真係為咗聽你句「213214」咩。食物中規中矩，正路嘢啦，貪新鮮試一次就可以了。