今日好難得約埋幾個舊同學落津津食飯、傾計！大眼妹好醒喎，早兩日已經打電話訂左碟大椒鹽瀨尿蝦，因為如果無訂，就只可以食普通size啦！好可惜我唔記得影相，但食完真係覺得好好味，都想同大家分享下！
我地揀左出面無冷氣個d位，一坐底，先黎一支藍妹先啦，咁至夠風味嘛，
首先真係要講下碟瀨尿蝦，成隻手板咁大，炸完之後，d肉仲係好鮮甜，同去流浮山差唔多，個個都食到好開心！
除此之外，一定要每人一隻乳鴿啦，最緊要記得唔好斬件，成隻撕黎食，唔多油，又夠晒香口！
椒鹽鮮魷併脆皮豆腐，鮮魷肉質鮮嫩，而且都算香脆，呢個下次要再食！豆腐都好滑，但下次試下併白餅魚，因為聽到隔離枱話好味！
雞粥,粥底夠綿，雞肉亦很多，而且都算滑！
炸大腸,又脆又軟，個個食完都話好食,正
蒜蓉粉絲蒸聖子皇,真係好大隻，味道都算唔錯，但要趁熱食！
沙拉骨,好新鮮,d肉好嫩，小肥話d汁超正，我就覺得ok啦！
吉列豬扒配特製wasabi沙律醬，之前睇食評話老闆娘私家炮製，我地驚要訂，所以都有訂埋，豬扒算好厚，仲竟然有汁，值得一試，誠意之作！
椒絲腐乳通菜,普普通通啦！
我最鐘意津津個種大排檔氣氛，"伙計，先黎一支藍妹" , 大叔即時大叫回應"得，一支藍妹，即到，要唔要冰桶？"服務就真係唔可以要求好似餐廳咁啦，有時仲寸寸地，但咁先似大排檔嘛！
