泰寮泰菜館 (已結業)

難得放四日假，一定唔可以虧待自己個肚仔，已經係連續第三晚出街食飯。今晚想食泰國菜，所以特登由大埔走去沙田間泰寮。好多人都話食泰國菜應該去九龍城，不過九龍城真係太唔就腳，而且好多餐廳都又迫又有D污糟，所以寧願去泰寮。好好彩，一去到就有位。我地叫咗原隻菠蘿焗飯、燒豬頸肉、泰式鐵板蠔仔同埋細冬陰公。原隻菠蘿焗飯($58)：我諗其實係將菠蘿炒飯塞落個菠蘿殼度。不過都幾好味，炒飯甜甜地，炒得啱啱好，唔會太淋。有D菠蘿粒，有三隻蝦，有幾件雞同魷魚，呢個價錢算係足料。燒豬頸肉($38)：次次去都食，因為燒得香口，外面脆、入面嫩，個泰式醬酸酸地辣辣地，好味！泰式鐵板蠔仔($48)：其實係蠔仔炒蛋，都幾大碟，好多蠔仔，不過就比較淡味，同埋有少少未溶嘅粉漿。細冬陰公($58)：全晚最好味！我地都好怕辣，不過呢個冬陰公湯就啱啱好唔會太辣，又酸酸地，好開胃！呢餐我地都好滿意，不過兩個人叫得太多嘢食，只係食到一半，攞返屋企聽日晏晝食啦。