Ocio (東港城) (已結業)

同小朋友食完飯，諗住去Häagen-Dazs食雪糕，但outdated既我完全唔知東港城既Häagen-Dazs冇堂食。諗起呢間新開左一段時間既西餐廳好似主打窩夫，所以就借呢個機會諗住試下，點知兩個小朋友見到門口餐牌上既刨冰就被吸引咗。當時其實已經4點幾，所以都好多位，直接入座。兩個小朋友睇完menu都係揀返刨冰，真係令我哭笑不得。根據經驗，刨冰冇次食得完，我仲要有兩個刨冰咁多，所以我都係同佢地share好啦。刨冰一黎到果然冇令小朋友失望，賣相好好睇，唔係透明或者求其一堆醬咁。同餐牌既相一樣，又大又靚。菠蘿刨冰仲有驚喜，有菠蘿圍住伴碟。味道方面，兩個刨冰都係外面既冰冇乜味。因為啲醬比較集中哂喺「雪山」入面，可能係為左營造視覺效果好睇啲。入面既冰就冇咁乾噌噌同冇乜味，好甜但唔會好漏同好假！不過始終冰太凍，加上餐廳毫不吝嗇既餐點份量，所以都係食唔哂。大件夾抵食，只針對刨冰，希望下次有機會試下窩夫。