1523 釗級廚房 (已結業)

幾乎每逢週末都會出街食下野，1523係常客，是日又黎左食午餐，哇哇，好多野都賣晒了，要食襯早啊～天氣悶熱，當然要點杯凍飲，跟餐飲品有半價，大約十蚊左右，點了凍檸茶同凍奶茶，茶底幾香無澀口。經常點之一，軍艦雙層魚堡薯條，厚厚的漢堡配上超多薯條。魚柳香脆嫩滑，仲夾左蕃茄、紅洋蔥同生菜令佢無咁漏，生菜仲有兩種添呀，除左常見嘅西生菜，仲有牛油生菜，呢種特別軟嫩好適合生食。薯條超級多，肥嘟嘟好有薯仔味，不過個人覺得紫菜調味粉下得太多有點鹹，好重手，哈哈。另一樣常點嘅就係香煎煙燻醬豬扒薯蓉，兩大塊豬扒實在太抵食了，豬扒軟腍，煎得十分香口，個邊邊的肥膏位尤其甘香，仲有吸左豬油嘅薯蓉都好正。家人至愛的忌廉汁蟹棒肉意粉，意粉軟硬度適中，醬汁杰身，而且每一條都沾有醬汁，濃郁好味。試新野點左芝士焗肉醬意粉，成碟焗所以個碟好熱㗎，小心。茄醬酸中帶甜幾啱口味，芝士下得超多，滿滿一盤意粉超飽，正。周末很難等位，想食就早啲黎攞飛仔，哈哈。