睿海御宴 (已結業)

大坑有好多小店，大部分都係cafe為主，難得中午搵到間可以飲茶，而且門面有條氣勢磅礴嘅火龍，咁吸晴，唔打得都睇得，所以俾佢吸引左上去。同一般酒樓一樣，點心都係大路嘢，選擇都多。鮑魚燒賣好大粒，粒鮑魚響向上面，整件事變得好豪華。鮑魚爽口，蝦肉豬肉比例適中，彈牙爽口。黑松露帶子角炸得好脆，入面好足料，好重松露味。帶子好鮮細，比蝦膠更甜更鮮。韮菜鮮蝦腐皮卷，腐皮好薄好脆口，而且炸得好乾身，裡面蝦肉好多，韮菜嘅香味，鮮蝦嘅爽口，外脆内軟嘅口感，非常好味。鮑粒咸水角，啤梨嘅造型好得意，煙靭嘅煎堆皮，彈牙嘅鮑粒，juicy 嘅肉碎，雖然只係咸水角，但都睇得出廚師嘅功力。壓軸登場嘅係魚翅灌湯餃，原盅上，湯入面已經有好多魚翅。餃子好大隻，餃皮又薄又滑，入面好足料。湯頭好甜鮮，再加上餃子入面嘅肉汁，甜上加甜。想開胃少少就可以加入醋，增加味道層次感，食落無咁滯。