行過聞到好香串燒味比呢間小店吸引，
睇menu覺得尖沙咀有呢個價錢好都算好抵所以試試佢！
小店裝修簡單，位置唔多，但根據我哋觀察佢係做外賣多，通常隔十幾分鐘就見到十幾盒串燒等人嚟拎！好彩堂食都唔會等好耐先有野食～
照樣嗌左蔬菜肉類同埋海鮮
串燒必吃韭菜同埋娃娃菜！之前去其他舖頭娃娃菜都係一片一片串埋當一串，但呢度串埋應該有一整個娃娃菜🤣見到真係覺得價錢真係好貼地合理。茄子鋪滿滿滿嘅蒜蓉同埋香料，又係另一款必吃～
肉類唔會燒到太柴好輕鬆就可以咬到，咬落仲有肉汁，尤其是係燒五花腩啲油好香～如果大家唔係食肉獸我會推介首選五花腩，之後係羊肉！
海鮮我哋試咗兩款唔同味嘅帶子，類似西式同中式感覺，芝士帶子好邪惡，主要食芝士嘅鹹味，個人覺得都係蒜蓉帶子更加容易帶到帶子個鮮味！帶子大大粒，鍾意食貝類嘅要試吓！
我哋仲嗌咗燒奶皇包同埋小饅頭，第一次見有呢啲燒烤有包嗌哈哈！兩款都係燒到外皮脆脆地，裏面都仲係好軟熟嘅感覺！推介奶皇包，雖然唔會做到流心效果，但感覺會再濕潤啲！
最後嗌咗個「甜品」棉花糖夾餅，第一次聽呢個組合，食完最後想食啲甜野隨便嗌左～意外地梳化餅嘅鹹味同埋棉花糖嘅甜味都好融合，係幾好食！（等我下次又喺屋企試整下，哈哈）
呢度嘅調味燒到串燒好惹味但係唔會過分咸，食完都唔會好口渴，推介大家嗌外賣或者堂食黎試吓！
