德國熱狗 (已結業)

秦石街市裝修完之後，多咗好多唔同種類嘅食肆，德國熱狗係其中之一，偶爾經過都會幫襯，試吓佢地唔同嘅熱狗。今日叫左瑞士碎肉牛角包，加左少少錢加配細薯條同白檸。呢個包非常特別地用左牛角包取代平時嘅熱狗包，一層層牛角包酥皮非常香口，而且熱辣辣。中間嘅切肉望落好似午餐肉，但食落好似pizza嘅辣肉腸味。而上面嘅芝士更加係精髓，溶化嘅芝士同切肉、牛角包融為一體，每咬一啖都非常滿足。成個包都好大份，對女仔黎講非常飽肚。而細薯條則係港式茶餐廳下午茶常見個種厚身薯條。配上嘅蕃茄醬似乎係自家製，食得出鮮蕃茄味，同一包包嘅茄醬好唔同。雖然有人覺得德國熱狗價錢比較貴，但一分錢一分貨，有份量又足料嘅熱狗，其實都算係物有所值。