味蔵 by city’super (已結業)

呢款限定嘅「喜知次」夢幻之魚係高級一夜干呀！四款燒魚之中必食，燒得啱啱好，肉質結實鮮甜，如果可以送酒就仲正，可惜佢哋九月先有酒牌。出邊好少有嘅雞肉天婦羅（大分縣名物），係一個驚喜。因為用嘅係蛋槳，一咬落去係薄脆然後啲超嫩滑嘅雞肉汁就「必」晒出嚟！朋友形容好似食緊槳爆西多咁。講開佢哋啲雞肉嫩，個「雞白湯烏冬」啲雞一樣咁嫩滑，唔鍾意食硬嘢嘅我好滿意主角呢個「味藏特製蒸Shabu鍋」就非常健康嘞，原汁原味。我揀咗山形縣A5和牛，連配菜墊底放入個鍋蒸8分鐘，係啱啱好呀。主廚見我哋係咁影相，走埋嚟介紹，話個木蒸籠係用日本檜木製做，好香嘅木味，直頭浸木桶溫泉嗰隻呢，而且直接用手掂一啲都唔熱，但係蒸肉片就啱啱好。開蓋之後香噴噴，隔離碟醬汁酸味味好能帶出鮮肉嘅味道，好開胃。唔好睇小嗰碟綠色嘅柚子醬，超鮮香，應該都係city’super有得賣。記住唔好嘥底下個「茅乃舍」湯底！頭先食完蒸，可以攞起個檜木蒸籠ShabuShabu追加夜菜、烏冬或者再烚肉。哪個「鮑魚磯煮」就好貴，係好好食好入味同彈牙，但係$318就食得好張就。