愛文生

營業中

休息中

成班中同好耐都無出黎敍下舊了，趁住今晚大家都得閒就相約黎呢度食下飯聯誼一番。諗返真係好耐無食大排檔了尤其係返工放工都無咩興趣想食。見佢門口有幾個大火爐，就知呢度嘅鑊氣有幾足。一坐低大家就七嘴八舌咁講下近況同返工趣聞差啲唔記得點餐。餐單一張過，但要食咩想食咩都可以同伙計講或者聽佢建議。但我地無頭緒所以完全交俾幫襯過嘅朋友發板。燒乳鴿。真係皮脆肉嫩而且無咩羶味，但略嫌唔夠入味多返啲椒鹽會更惹味。全餐最好食嘅薯仔牛柳粒。薯仔好鬆化同香口完全係呢度菜嘅精粹，牛仔粒炒到有少少焦香，非常適合做一道下酒菜。西蘭花炒鮮魷。唔算特別但鮮魷厚實幾有咬口，不過不失咁啦。鼓汁蒸鱔。呢度我地係叫錯左嘅因為本身想食係砵酒焗鱔煲，但原來朋友口快快講錯左上枱先發覺。鱔魚本身夠肥美而且蒸得啱啱好，所以入口彈牙同嫩滑，幾唔錯同埋個鼓椒汁好送飯。黃金蝦。呢道就覺得差左啲食落唔係咁香口，同埋油膩咗少少。雖然蝦肉都大隻但唔夠乾身成為左佢嘅瑕疵。大排檔黎講呢度算唔錯，食物都有返咁上下，但最緊要係個氣氛好適合一大班人黎啤酒一番。