「迆」雪糕專門店 (已結業)

同朋友去左深水埗周圍遊，撞著撞著撞左入一間雪糕店。店內裝修簡潔，冇太多奢華多餘的裝修，不過凳唔算十分好坐。店內的雪糕都係素食，以植物奶配搭各種地道口味製成的雪糕。我揀左「夠姜迆」，仲要係特迆，即係姜味雪糕加左枝檸檬冰冰棒。第一次試素食雪糕，同奶製雪糕比，感覺少了一份軟綿細滑，不過口感仍然不錯！而且真心姜味十足夠晒姜，啱晒我呢啲好姜一族！檸檬雪條夠晒酸，好開胃的味道！配埋幾粒焦糖脆脆同個竹炭雪糕筒，真係一個好特別的配搭！有機會可以再去試埋其他味！