Pause It (已搬遷)

夜晚自己做完嘢行旺角，行到麥花臣球場附近，遇見呢間門面簡約嘅餐廳，於是入左去坐。

餐牌都係精緻嘅食物，睇得出用心供應食物。

因為太夜無乜胃口，叫左個三文治，又難得廚房肯整。免治牛肉係唔錯，麵包麵烘得好好。食薯條當然要配上茄汁！

我最好奇嘅係呢杯竹炭咖啡，飲落口的確有一種清新嘅感覺。上面嘅拉花好靚，好少可會拉天鵝俾我⋯⋯係好有心機嘅一間咖啡店。

上菜果陣就係咁。

望住旺角馬路上人來人往，我食住個三文治，感覺自己融入左成為櫥窗嘅一部份。街上嘅人望入嚟，又唔係真係望住我，呢種感覺都幾香港。