大喜屋 (已結業)

銅鑼灣大喜屋係我咁多年都會繼續去嘅放題。一嚟位置就腳，二嚟大喜屋質素好，一講起放題好多時都會嚟呢到咖！雖然位置唔大，但都有卡位坐咖！一坐低店員就叫我地寫咗凍食先，估唔到連放題都有凍海鮮食呀！青口，蟹腳，凍蝦，仲有螺呀。全部都夠凍又新鮮，蝦肉質爽口。而蟹腳都幾鮮甜，唔會得海水死咸！每枱都預先放咗較剪係到，方便客人食蟹腳。刺身厚切！厚切！厚切！大喜屋嘅刺身水準一向好，夠鮮甜同肥美。最愛帶子同油甘魚，啖啖入口即溶。軍艦試咗兩種，海膽同軟殼蟹。海膽正常味唔腥，反而軟殼蟹好食，脆口加上沙律醬味道豐富。吉品鮑汁燴花膠聽個名好似好勁咁，一上枱真係有好大舊花膠咖！伴上鮑汁又淋又入味，放題食呢啲好有創意。瑤柱扒豆苗又一個中式菜，瑤柱佈滿豆苗面。豆苗吸哂瑤柱香味，同樣好食。 炸食必食的芝麻雞翼，又香又脆。芝士年糕芝士味濃，煙煙韌韌正！燒牛舌另一必食的！牛舌厚切，燒得好有火口。食落juicy，好爽口。甜品有牛奶布丁，十分滑，奶味亦濃。馬卡龍一口一粒，口感鬆軟，味道不太甜。最後一人一個嘅雪糕，揀咗dreyer's嘅雜莓味甜筒。大喜屋總係不會令人失望！