Funky 美式自助軟雪糕專門店 (已結業)

　　要講最耐，應該係等枱，因為一張枱唔係大，黎親o既客通常又兩個兩個咁，無理由搭台架？故此等枱先係最耐，天氣咁熱入黎買得雪糕通常都唔會走返出去熱，再加上... 呢度冷氣好夠。　　我知道係有原因o既，一來配料都要keep個比較低o既溫度，二來冷氣細雪糕就溶得快。入去o個陣我無留意呢度賣乳酪雪糕，只覺得雪糕食起黎水水地、無乜忌廉，後來知道呢度賣乳酪雪糕呢，真係，唔怪得，店員話佢地D雪糕係低脂。(請注意，低脂雪糕食得多一樣會肥。)　　自助軟雪糕除左好玩之外，相信亦為店家帶黎可觀營業額，尤其係好鐘意一圈一圈咁卷雪糕o既人 --- 好似我咁 --- 隨便揀三隻味都俾左四十幾蚊。我試左豆腐、北海道牛乳同比利時朱古力，其中比利時朱古力質感較硬似普通雪糕，其他都水水地好易溶(香味較淡甜度高)。朱古力甜度較淡，略帶苦味，可可香味濃郁，簡直同朱古力醬有得比，顏色係深啡黑色，唔鐘意食甜o既人可以揀佢。　　店員話佢地日日都會打料，今日有呢個款聽日未必有。想特定食某一款真係要打電話問左先喇。