佳佳甜品 (已搬遷) 新店位置

佐敦呢頭絕對唔係我地既活動範圍，有幸偶遇隔離鋪唯珍，剛好J2台飲食男女介紹過，佳佳近在咫尺，不尋而遇，我覺得真係超好彩。 個節目介紹老闆對中式糖水既堅持，無錯，呢度無咩楊枝甘露，無乜撈物撈，有既就係細個去下村糖水鋪食果d ,芝麻糊，杏仁糊，雪耳木瓜，湯丸。老闆喺節目話過，一家人，食完晚飯黎食碗糖水，點可以賣得貴過正餐，今時今日仲有咁既良心商人，真係好難能可貴。自從遇上，食左幾次，杏仁露食得出係生磨無粉味，當然係好. 但係每次都忍唔住要叫湯丸，皮既滑，係差d咕一聲就會吞落肚，黑芝麻既香係食完仲留喺味蕾。好似呢排天氣凍，簡單食碗薑汁寧波湯丸，個薑湯既香辣，從佢微黃色既湯底就知真材實料，8粒價錢只係15蚊，就算特登黎食都係值得。