一錢 (已結業)

平時好少去大角咀搵食，難得出開奧海城行街，決定睇下附近有咩食，經過利奧坊，被呢間型格新派、紫藍光為主嘅居酒屋吸引~🍻 鐵板晚市限定（二人前）$348價錢合理，包七款美食：慢煮鴨胸醬油漬、南蠻炸雞、明太子芝士奄列、香蔥牛肉薄燒、阿波尾雞一夜干、北海道四元豚腩同鐵板炒麵。南蠻炸雞外皮炸得香脆，雞肉肉質結實、配以糖醋、蔥及辣椒製成嘅醃漬料，味道甜甜鹹鹹，但唔會太鹹、太濃味。奄列面有滿滿嘅明太子同沙律醬，加上蔥花，略嫌加蔥花後味道有啲唔太適合，但勝在口感飽滿，奄列嫩滑，充滿蛋香。香蔥牛肉薄燒有驚喜，牛肉燒得好香，包裹住滿滿嘅香蔥，口感食落爽脆清甜。北海道四元豚腩同樣有驚喜，口感香脆、肥瘦分明，即使有肥肉但食落都幾香口。鐵板炒麵都唔錯，食落幾有溫度，份量唔少，配上炒豚肉片同雜菜，除咗味道淡左少少，整體而言都係唔錯。