八王子居酒屋 (已結業)

間間火煱唔係Full Booking，就係排長龍，於是試吓入亞士厘揾食，最後因為佢有鍋物，咁就入去幫襯。燒蠔 － 揀咗麵豉味，上桌實物Size唔算太細，麵豉燒得有D焦，好野味吓。而且味道唔腥兼仲好Juicy，正！牛舌 － 係一定會食嘅燒野，燒得外脆內軟，不過鹽可以落多些少，略嫌唔夠濃味來送清酒！霜燒牛肉 － 牛肉都幾鮮嫩吓，半生熟配搭咗一個酸酸地嘅汁幾鬼醒神吓！牡丹蝦刺身 － 朋友至愛嘅剌身，啖啖爽甜蝦肉，跟手炸咗個蝦頭送酒一流！雜錦海鮮鍋物 － 有蠔、魚、蝦、魷魚、帶子、魔芋、金菇 … 不能盡錄，樣樣都好新鮮，加上係冬天日子食就合晒時令，份量頗大，我哋未清晒就比佢KO咗！佈置真係幾過癮，煙癮起到門口「打邊爐」，先發覺個煙灰缸係「雪印 xxxx」，雪印有出煙嘅咩？守门口嗰位四眼妹妹話係日本古董裝牛奶嘅筒，老細見到佢高度幾啱吓就改裝成煙灰缺，真係抵死兼創意十足！