松山海鮮鍋 (已結業)

睇食評個個都去食火鍋，真係以為佢地只係一間火鍋店，本身我地打算去食火鍋嘅，不過見到佢原來係有小菜食，唔係只得火鍋食，於是就想試下食小菜！同埋前幾日先打完邊爐，又打邊爐有啲厭。我見佢呢度啲小菜都有幾多選擇下，我地叫啲菜集合了豬，雞，魚同海鮮，認真豐富。虎皮尖椒爆黑豚肉，煮得幾入味，有啲辣，但反而更加提出肉嘅鮮美，好味！（掛住食，無影到）蒸雞，蒸得啱啱好，肉質保持嫩滑，無騷味，唔會蒸得太乾，仲有啲湯汁，幾鮮美。蒸魚：肉質都幾滑，不過可以再多啲芫茜，因為本人係芫茜控……刺身拼盤：我地見佢門口就係魚池，可以保證到食材嘅新鮮，於是抵受不了誘惑，叫咗個拼盤嚟食，都唔錯架。